ശബരിമല തീര്ഥാടകരുമായി എത്തിയ ഡ്രൈവറെ മര്ദിച്ച എഎസ്ഐയ്ക്ക് സസ്പെന്ഷന്
ശബരിമല: ശബരിമല തീര്ഥാടകരുമായി എത്തിയ സ്വകാര്യ ട്രാവലര് ഡ്രൈവറെ നിലയ്ക്കലില് വച്ച് മര്ദിച്ച സംഭവത്തില് എഎസ്ഐ ജിജോയെ സസ്പെന്ഡ് ചെയ്യാന് നിര്ദേശം. ശബരിമല കോ. ഓര്ഡിനേറ്റര് കൂടിയായ എഡിജിപി പി വിജയനാണ് നിര്ദേശം നല്കിയത്. മര്ദനത്തിന്റെ വീഡിയോ ദൃശ്യങ്ങള് പരിശോധിച്ചതിന്റെ അടിസ്ഥാനത്തിലാണ് നടപടി. ശബരിമലയില് സ്പെഷ്യല് ഡ്യൂട്ടിക്കായി നിയോഗിച്ച എറണാകുളം സ്വദേശിയായ ജിജോയാണ് ഡ്രൈവറുടെ മുഖത്ത് അടിച്ചത്
പറവൂര് സ്വദേശി പ്രശാന്തിനാണ് മര്ദ്ദനമേറ്റത്. ഡ്രൈവറുടെ മുഖത്ത് അടിക്കുന്ന ദൃശ്യങ്ങള് വ്യാപകമായി പ്രചരിച്ചിരുന്നു. നിലയ്ക്കല് പാര്ക്കിങ് ഗ്രൗണ്ടില് തീര്ത്ഥാടകരെ ഇറക്കുന്നതിനിടെ വാഹനം പാര്ക്ക് ചെയ്യുന്നതിനെച്ചൊല്ലിയുണ്ടായ തര്ക്കമാണ് മര്ദ്ദനത്തില് കലാശിച്ചത്. തര്ക്കത്തിനിടെ പ്രകോപിതനായ പൊലീസ് ഉദ്യോഗസ്ഥന് വാഹനത്തിന്റെ താക്കോല് ഊരിയെടുക്കുകയായിരുന്നെന്ന് പ്രശാന്ത് പറഞ്ഞു. അസഭ്യം പറയുകയും പലതവണ കൈയേറ്റം ചെയ്യുകയും ചെയ്തതായുമാണ് പ്രശാന്തിന്റെ പരാതി.
