ജെ.സി. ഡാനിയേൽ പുരസ്കാരം സംവിധായകൻ ടി.വി. ചന്ദ്രന്

തിരുവനന്തപുരം: ചലച്ചിത്ര രംഗത്തെ സമഗ്ര സംഭാവനക്കുള്ള 2022ലെ ജെ.സി. ഡാനിയേൽ പുരസ്കാരം സംവിധായകൻ ടി.വി. ചന്ദ്രന്. അഞ്ചു ല‍ക്ഷം രൂപയും പ്രശസ്തിപത്രവും ശിൽപവും അടങ്ങുന്നതാണ് പുരസ്കാരം.

സാംസ്കാരിക വകുപ്പ് മന്ത്രി സജി ചെറിയാൻ വാർത്താക്കുറിപ്പിലൂടെയാണ് പുരസ്കാര വിവരം അറിയിച്ചത്. 2021ലെ ജെ.സി. ഡാനിയേൽ അവാർഡ് ജേതാവും സംവിധായകനുമായ കെ.പി. കുമാരൻ ചെയർമാനും, നടനും എഴുത്തുകാരനുമായ വി.കെ. ശ്രീരാമൻ, നടിയും സംവിധായികയുമായ രേവതി എന്നിവർ അംഗങ്ങളും ചലച്ചിത്ര അക്കാദമി സെക്രട്ടറി സി. അജോയ് മെമ്പർ സെക്രട്ടറിയുമായ സമിതിയാണ് പുരസ്‌കാര ജേതാവിനെ തെരഞ്ഞെടുത്തത്.