കൊട്ടിയൂർ വൈശാഖ മഹോത്സവം; ഇന്ന് പുണ്യപുരാതനമായ രേവതി ആരാധന

കൊട്ടിയൂർ : പ്രശസ്തമായ കൊട്ടിയൂർ വൈശാഖ മഹോത്സവത്തിലെ മൂന്നാമത്തെ ആരാധനാപൂജയായ ‘രേവതി ആരാധന’ ഇന്ന് (ജൂൺ 10) അക്കരെ സന്നിധിയിൽ നടക്കും. ഇളനീരാട്ട മഹോത്സവം കഴിഞ്ഞിട്ടും കൊട്ടിയൂരിലേക്ക് ഭക്തജനങ്ങളുടെ വൻ ഒഴുക്കാണ് ദൃശ്യമാകുന്നത്.

​ആരാധനാ പൂജയായതിനാൽ ഇന്ന് ഉച്ചശീവേലിക്ക് മണിത്തറയിലെ സ്വർണ്ണ, വെള്ളി പാത്രങ്ങളും വിളക്കുകളും പിടിച്ച് വിശേഷ വാദ്യമേളങ്ങളോടെയുള്ള ‘പൊന്നിൻ ശീവേലി’ നടക്കും. തുടർന്ന് ഭക്തർക്കായി സവിശേഷമായ ആരാധനാ സദ്യയും ഒരുക്കിയിട്ടുണ്ട്. സന്ധ്യാസമയത്ത് പെരുമാൾക്ക് അതിപ്രധാനമായ പാലമൃത് അഭിഷേകം (നവകപൂജയോടെ) നടക്കും. ഉത്സവത്തിലെ അവസാനത്തെ ആരാധനാപൂജയായ രോഹിണി ആരാധന ജൂൺ 14-നാണ്.

നിലവിൽ കർണ്ണാടക ഉൾപ്പെടെയുള്ള മറ്റ് സംസ്ഥാനങ്ങളിൽ നിന്നുള്ള തീർത്ഥാടകരുടെ വലിയ തിരക്കാണ് കൊട്ടിയൂരിലുള്ളത്. ഭക്തർക്ക് ദർശനത്തിനായി മണിക്കൂറുകളോളം ക്യൂ നിൽക്കേണ്ടി വരുന്നുണ്ടെങ്കിലും, ദേവസ്വവും പോലീസും വിപുലമായ പാർക്കിംഗ്-ട്രാഫിക് ക്രമീകരണങ്ങൾ ഒരുക്കിയതിനാൽ കാര്യമായ ഗതാഗതക്കുരുക്കില്ലാതെ ഭക്തർക്ക് മടങ്ങാൻ സാധിക്കുന്നുണ്ട്.