പ്രധാനമന്ത്രിക്കെതിരായ പരാമര്ശം; ജാന്മണിക്കെതിരെ കേസെടുത്തു
തിരുവനന്തപുരം: പ്രധാനമന്ത്രി നരേന്ദ്ര മോദിയേയും അദ്ദേഹത്തിന്റെ അമ്മയേയും നവ മാധ്യമങ്ങളിലൂടെ അപമാനിച്ചെന്ന പരാതിയില് മേക്കപ്പ് ആര്ട്ടിസ്റ്റ് ജാന് മണിക്കെതിരെ കേസെടുത്തു. കോഴിക്കോട് സൈബര് പൊലീസ് ആണ് കേസടുത്തത്. മഹിളാ മോര്ച്ച സംസ്ഥാന പ്രസിഡന്റ് നവ്യാ ഹരിദാസ് നല്കിയ പരാതിയിലാണ് നടപടി. ഇന്നലെ കേരളത്തിലെ മുഴുവന് പൊലീസ് സ്റ്റേഷനുകളിലും പരാതി നല്കാന് മഹിളാ മോര്ച്ച തീരുമാനമെടുത്തിരുന്നു.
ഇന്നലെയാണ് കോഴിക്കോട് സിറ്റി പൊലീസ് കമ്മീഷണര് ഷൗക്കത്തലിക്ക് നവ്യ ഹരിദാസ് പരാതി നല്കിയത്. പ്രധാനമന്ത്രിയെ ജാന്മണി അപമാനിച്ചതായി നവ്യ ഹരിദാസ് ആരോപിച്ചിരുന്നു. പരാമര്ശത്തിന് പിന്നില് ഭാഷാ പരിമിതി അല്ലെന്നും പരാതിയില് പറഞ്ഞിരുന്നു. ജാന്മണിയുടെ മാപ്പ് പറച്ചില് അംഗീകരിക്കുന്നില്ലെന്നും തെറ്റ് ചെയ്തതിനുശേഷം മാപ്പ് പറഞ്ഞാല് തീരില്ലെന്നുമായിരുന്നു മഹിളാ മോര്ച്ചയുടെ നിലപാട്. നിലവില് കേസ് രജിസ്റ്റര് ചെയ്തിട്ടും മറ്റ് പൊലീസ് സ്റ്റേഷനുകളിലും മഹിളാ മോര്ച്ച പരാതി നല്കിക്കൊണ്ടിരിക്കുകയാണെന്നാണ് വിവരം.