കോഴിക്കോട് നഗരത്തില് ഇന്ന് ഗതാഗത നിയന്ത്രണം; ബീച്ച് ഭാഗത്തേയ്ക്ക് വാഹനങ്ങള്ക്ക് പ്രവേശനമില്ല
കോഴിക്കോട്: ബീച്ച് ഫ്രീഡം സ്ക്വയറില് നടക്കുന്ന സിപിഎമ്മിന്റെ ബഹുജന റാലിയോട് അനുബന്ധിച്ച് ചൊവ്വാഴ്ച (സെപ്റ്റംബര് 15) വൈകീട്ട് 3 മുതല് കോഴിക്കോട് നഗരത്തില് ഗതാഗത നിയന്ത്രണം ഏര്പ്പെടുത്തും. ബീച്ച് ഭാഗത്തേക്ക് വൈകീട്ട് 3 മുതല് വാഹനങ്ങള്ക്ക് പ്രവേശനം ഉണ്ടായിരിക്കുന്നതല്ല. ബീച്ച് ഫ്രീഡം സ്ക്വയറില് നടക്കുന്ന പരിപാടിയില് പങ്കെടുക്കാന് എത്തുന്നവരുടെ വാഹനങ്ങള് താഴെ പറയുന്ന വിധം ക്രമീകരിക്കേണ്ടതാണ്.
എലത്തൂര് ഭാഗത്തുനിന്നും വരുന്ന വാഹനങ്ങള് വെങ്ങാലി ബ്രിഡ്ജിന്റെ അടിയില് കൂടെ പുതിയാപ്പ, ഭട്ട് റോഡ് ബീച്ച് വഴി ഗാന്ധി റോഡ് ജംക്ഷനില് ആളെ ഇറക്കി ഭട്ട് റോഡ് ബീച്ച് റോഡ് അരികില് പാര്ക്ക് ചെയ്യണം.
പേരാമ്പ്ര, ബാലുശ്ശേരി, താമരശ്ശേരി, കുന്ദമംഗലം, തിരുവമ്പാടി, കക്കോടി എന്നീ ഭാഗങ്ങളില് നിന്ന് വരുന്ന വാഹനങ്ങള് കണ്ണൂര് റോഡ് – ക്രിസ്ത്യന് കോളജ് ജംക്ഷന് വഴി ഫ്ലൈഓവറിന് സമീപം ആളുകളെ ഇറക്കിയ ശേഷം നടക്കാവ് – എരഞ്ഞിപ്പാലം വഴി പിഡബ്ല്യുഡി റോഡിലുള്ള സരോവരം ട്രേഡ് സെന്ററിന് സമീപമുള്ള മൈതാനിയില് വാഹനങ്ങള് പാര്ക്ക് ചെയ്യണം.
ഫറോക്ക്, രാമനാട്ടുകര, ബേപ്പൂര് ഭാഗങ്ങളില് നിന്ന് വരുന്ന വാഹനങ്ങള് പുഷ്പ ജംക്ഷന് എകെജി ഫ്ലൈ ഓവര് വഴി സീ ക്യൂന് ഹോട്ടലിന് സമീപം ആളുകളെ ഇറക്കിയ ശേഷം തിരിച്ച് കോതി സൗത്ത് ബീച്ചില് വാഹനങ്ങള് പാര്ക്ക് ചെയ്യണം. ക്രിസ്ത്യന് കോളജ് കണ്ണൂര് റോഡ് ജംക്ഷനില് ആളുകളെ ഇറക്കിയ ശേഷം അശോകപുരം വഴി സരോവരം റോഡിന് എതിര്വശത്തുള്ള പീവീസ് ഗ്രൗണ്ടില് വാഹനങ്ങള് പാര്ക്ക് ചെയ്യണം.
നഗരത്തിലെ പ്രധാന റോഡുകളില് വാഹന പാര്ക്കിങ് നിരോധിച്ചിട്ടുള്ളതിനാല് റോഡരികിലും മറ്റ് നിരോധിത സ്ഥലങ്ങളിലും വാഹനങ്ങള് പാര്ക്ക് ചെയ്യാന് പാടില്ല. എയര്പോര്ട്ട്, റെയില്വേ സ്റ്റേഷന് എന്നിവിടങ്ങളിലേക്ക് യാത്ര ചെയ്യേണ്ടവര് യാത്രാസമയം കണക്കിലെടുത്ത് നേരത്തെ യാത്ര തിരിക്കണം.