തെരുവ് നായ കുറുകെ ചാടിയതിനെ തുടർന്ന് നിയന്ത്രണം വിട്ട ഓട്ടോ മറിഞ്ഞ് 10 വയസുകാരന് ദാരുണാന്ത്യം
തിരുവനന്തപുരം: കടക്കാവൂർ നിലയ്ക്കാമുക്കില് തെരുവ് നായ കുറുകെ ചാടിയതിനെ തുടർന്ന് നിയന്ത്രണം വിട്ട ഓട്ടോ മറിഞ്ഞ് 10 വയസുകാരന് ദാരുണാന്ത്യം.അഞ്ചുതെങ്ങ് മാമ്പള്ളി നല്ലാംതിട്ടയില് വാള്ട്ടർ- ബിജി ദമ്പതികളുടർ മകൻ കുട്ടു എന്ന് വിളിക്കുന്ന ബിനോയ് ആണ് മരിച്ചത്. ബുധനാഴ്ച വൈകിട്ട് 3.15-ഓടെയായിരുന്നു സംഭവം.
അമ്മ ബിജിയും ബിനോയിയും സഹോദരി ബ്ലസിയും മൊബൈല് ഫോണ് നന്നാക്കാനായി ആറ്റിങ്ങലിലേക്ക് പോകവേ, നിലയ്ക്കാമുക്ക് ചന്തയ്ക്ക് മുന്നില്വച്ച് ഇവർ സഞ്ചരിച്ച ഓട്ടോറിക്ഷ ഫുട്ട്പാത്തിലേക്ക് ഇടിച്ചു കയറി മറിയുകയായിരുന്നു. അപകടത്തില് ബിനോയ് ഓട്ടോറിക്ഷയ്ക്ക് അടിയില് പെടുകയായിരുന്നു. തെരുവുനായ കുറുകെ ചാടിയതാണ് അപകടത്തിന് കാരണമെന്നാണ് വിവരം.
തുടർന്ന് മറ്റൊരു വാഹനത്തില് ഇവരെ ചിറയിൻകീഴ് താലൂക്ക് ആശുപത്രിയിലേക്ക് എത്തിച്ചെങ്കിലും ബിനോയിയുടെ ജീവൻ രക്ഷിക്കാനായില്ല. അപകടത്തില് അമ്മ ബിജി, മാമ്പള്ളി സ്വദേശിയായ ഡ്രൈവർ ഗുലായിസ് (രാജു) എന്നിവർക്ക് പരിക്കേറ്റു.