സ്ഥാപന ഉടമ വിളിച്ചെന്ന് തെറ്റിദ്ധരിപ്പിച്ചു; പയ്യന്നൂരില് ജീവനക്കാരിയുടെ കൈയില് നിന്ന് പണം തട്ടിപ്പറിച്ചോടി യുവാവ്
പയ്യന്നൂർ.പ്രിന്റിങ് സ്ഥാപനത്തില് അതിക്രമിച്ചു കയറി ജീവനക്കാരിയെ തെറ്റിദ്ധരിപ്പിച്ച് മേശപ്പുറത്തിരുന്ന പണം തട്ടിപ്പറിച്ച് യുവാവ് ഓടിരക്ഷപ്പെട്ടു.പയ്യന്നൂർ പുതിയ ബസ് സ്റ്റാൻഡിന് സമീപം ചിറ്റാരിക്കാല് കുന്നുംകൈ സ്വദേശി ജിൻസിന്റെ ഉടമസ്ഥതയിലുള്ള ‘കെസ്റ്റർ ഗ്രാഫിക്സ്’ എന്ന സ്ഥാപനത്തിലാണ് സംഭവം നടന്നത്. ചൊവ്വാഴ്ച ഉച്ചയ്ക്ക് 1.30 ഓടെയായിരുന്നു കവർച്ച.
സ്ഥാപനത്തിലെ ജീവനക്കാരിയായ മാതമംഗലം സ്വദേശിനി നിവ്യ ഭക്ഷണം കഴിച്ചുകൊണ്ടിരിക്കുമ്പോഴാണ് അജ്ഞാതനായ യുവാവ് അകത്തേക്ക് കയറിവന്നത്. സ്ഥാപന ഉടമ പിലാത്തറയിലെ ഓഫീസിലാണെന്ന് നിവ്യ പറഞ്ഞതോടെ, താൻ ജിൻസുമായി ഫോണില് സംസാരിക്കുകയാണെന്ന് യുവാവ് തെറ്റിദ്ധരിപ്പിക്കുകയായിരുന്നു.
തുടര്ന്ന് ‘ജയകുമാർ എന്നൊരാള് വരുമെന്നും അയാള് 27,000 രൂപ തരുമെന്നും അത് വാങ്ങി വെക്കണമെന്നും’ യുവാവ് ജീവനക്കാരിയോട് പറഞ്ഞു. കൂടാതെ കടയിലുള്ള 2,000 രൂപ തനിക്ക് തരാൻ ഉടമ പറഞ്ഞിട്ടുണ്ടെന്നും യുവാവ് അവകാശപ്പെട്ടു